Бугун Уйчи тумани тиббиёт жамоатчилиги иштирокида тантанали тадбир бўлиб ўтди. Тадбирни туман тиббиёт бирлашмаси бошлиғи вазифасини бажарувчи Дилором Маматхонова очиб берди.
Вилоят соғлиқни сақлаш бошқармаси бошлиғи Абдулҳоди Иминов барчани кириб келаётган қутлуғ айём — Мустақиллик куни билан табриклади. У мустақиллик йилларида барча соҳалар қатори соғлиқни сақлаш тизимида ҳам улкан ислоҳотлар амалга оширилганини таъкидлади.
Халқимизни тиббиёт хизматидан рози қилиш — саломатлик посбонлари олдида турган энг муҳим вазифалардан бири эканлиги қайд этилди. Самарали фаолияти билан эл олқишига сазовор бўлаётган фидойи тиббиётчиларнинг меҳнати давлатимиз томонидан юксак қадрланмоқда.
Жумладан, Ўзбекистон Республикаси Давлат мустақиллигининг 34 йиллиги арафасида давлат мукофотлари билан тақдирланганлар сафида соғлиқни сақлаш ходимлари ҳам бор. Хусусан, «Ёрқатай» оилавий шифокорлик пункти тиббий бригадаси дояси Наима Қутбиддинова «Соғлом турмуш» медали билан тақдирланди.
Тадбирда Н.Қутбиддинованинг ибратли фаолияти тилга олиниб, унинг халқ саломатлигини мустаҳкамлаш борасидаги саъй-ҳаракатлари бошқалар учун намуна сифатида қайд этилди.
