Ўзбекистон касаба уюшмалари ҳаракатининг 120 йиллик юбилейи муносабати билан Самарқанд вилоят соғлиқни сақлаш бошқармаси ва Ўзбекистон соғлиқни сақлаш ходимлари касаба уюшмаси Самарқанд вилояти кенгаши хамкорлигида, жорий йилнинг 15-16-феврал кунлари Самарқанд шаҳрида “Шифокорлар ўртасида Футзал бўйича анъанавий ҳалқаро турнир” бўлиб ўтди.
Ўтказилган турнирда Ўзбекистон Республикаси Соғлиқни сақлаш вазирлиги ва МДХ мамлакатлари тизимидаги даволаш-профилактика муассасалари, илмий амалий марказлар, санитария–эпидемиология хизмати муассасалари, хусусий клиникалар, фармацевтик компанияларда фаолият олиб бораётган 25-60 ёшгача бўлган олий маълумотли врачлар, раҳбар ходимлар иштирок этадилар.
Ушбу спорт мусобақалари икки ёш тоифасида яъни 25 ёшдан 40 ёшгача бўлган ходимлар ўртасида алоҳида ва 40 ёшдан катта бўлган фахрий ходимлар ўртасида алоҳида ўтказилди ва ғолиблар ҳам шу тартибда аниқланди.
Ўтказилган турнирда жами 23 та жамоалар республикамизнинг барча вилоятларидан ҳамда қўшни Тожикистон республикасидан учта жамоа иштирок этди.
“Шифокорлар ўртасида Футзал бўйича анъанавий ҳалқаро турнир”ни Ўзбекистон касаба уюшмалари Федерациясининг Самарқанд вилоят кенгаши раиси С.Раифқов очиб берди ва барча иштирокчи ва меҳмонларни табриклаб, уларга омадлар тилади.
Шундан кейин вилоят Соғлиқни сақлаш бошқармаси бошлиғи С.Зайниев сўзга чиқиб, барча иштирокчи ва меҳмонларни Самарқанд шаҳрига келганлари билан қутлаб, уларга омад тилади.
Турнирда жамоаларнинг ўйини қура ташлаш йўли орқали аниқлаб олиниб, ўйинлар вилоятимизнинг малакали ҳакамлари томонидан баҳолаб борилди.
Турнир якунига кўра 25 ёшдан 40 ёшгача бўлган жамоалар ўртасида фахрли учинчи ўринни Фарғона вилоятининг “ALFA” жамоаси эгаллаган бўлса, фахрли иккинчи ўринни Фарғона вилоятининг “MEDIKAL” жамоаси эгаллади, фахрли биринчи ўринни эса Самарқанд вилоятининг жамоаси эгаллади.
Ҳудди шундай 40 ёшдан катта фахрий ходимлар ўртасида эса фахрли учинчи ўринни Қашқадарё вилоятининг “НАСАФ МЕД” жамоаси эгаллаган бўлса, фахрли иккинчи ўринни Сирдарё вилоятининг жамоаси, фахрли биринчи ўринни Самарқанд вилоятининг фахрийлари эгаллашдилар.
Турнирга ташриф буюрган меҳмонлар ўйиндан бўш вақтларида Самарқанд шаҳрининг тарихий обидалари ва мустақиллик йилларида барпо этилган иншоатларини томоша қилишдилар.
Ўзбекистон Соғлиқни сақлаш ходимлари касаба уюшмаси Самарқанд вилояти кенгаши томонидан турнир ғолиблари ва белгиланган номинациялар бўйича ғолибларга қимматбаҳо эсдалик совғалари, медаллари ва кубоги ажратилди.
Шундан кейин жамоалар яна бир йилдан кейин соғ-омон кўришгунча деб хайрлашишдилар.
